Áhættufíklar á Wall Street

Við lestur þessarar fréttar um áhættufíkla og Wall Street detta mér í hug tvær bækur eftir Michael Lewis.  Sú fyrri heitir "Liar's Poker" og var gefin út snemma á níunda áratug síðustu aldar og fjallar um innreið "Bond trading" á Wall Street, en þar höfðu menn mest fengist við "Equity trading" fram að því.  Þetta gerðist á árinu 1977 og á næstu árum þar á eftir.  Í bókinni kemur glögglega fram hvernig persónuleikar það eru sem sækjast í störf miðlara og sölumanna á verðbréfamarkaði.  Mjög margir þeirra eru áhættufíklar á misháu stigi með takmarkað jarðsamband, og jafnvel með aðrar og fleiri karakterveilur líka.

Síðari bókin er eftir sama höfund, og heitir hún "The Big Short".  Þar fer höfundur yfir atburði á Wall Street síðustu árin fyrir hrun, fjallar um viðskipti með vafninga sem gerðir voru um svokölluð undirmálslán á fasteignamarkaði, og afleiður þar sem tekin var staða gegn þessum vafningum. 

Höfundur var starfsmaður hjá fyrirtækinu Salomon Brothers á Wall Street á árunum 1980 til 1990 (cirka) og hefur fyrri bók hans stundum verið kennt um fall þess fyrirtækis.  Salomon Brothers var brautriðjandi á sviði viðskipta með skuldabréf á Wall Street á sínum tíma, og var fyrsta verðbréfafyrirtækið á Wall Street  sem fór á markað með hlutabréf sín, en líka eitt það fyrsta sem féll, strax á síðustu öld.  Löngu fyrir það sem við nú köllum hrun. 

Sem fyrrum starfsmaður á þessum vettvangi skrifar Charles Lewis um þessi mál af næmri þekkingu, og að baki bókum hans liggur mikil gagnaöflun og viðtöl við fjölda fólks.  Það því fádæma lærdómsríkt að lesa bækur hans vilji maður fræðast um þennan vettvang fjármálaheimsins.

Orsök fjárhagsáhyggna fundin